Rusiyanın məşhur çay markaları olan "TESS" və "Greenfield" çaylarında sağlamlıq üçün zərərli sayılan pestisidlərin normadan artıq olduğu aşkarlanıb.
Həmin çay çeşidləri Azərbaycanda da geniş şəkildə satışda olduğundan, məsələ ciddi narahatlıq doğurmuşdu.
Buna görə də Azərbaycan Qida Təhlükəsizliyi Agentliyi (AQTA) adıçəkilən çay çeşidlərindən nümunələr götürərək laborator müayinələrə cəlb etdiyini açıqlamışdı.
Hazırda isə marketlərdə "TESS" və "Greenfield" çayları xüsusi təkliflərlə endirimli satışa çıxarılıb. Bu, istər-istəməz sual yaradır: endirimdəki çaylar həmin zərərli pestisidlərin olduğu partiyadandırmı? Çayların xüsusi endirimlə satışa çıxarılıb "başdan edilməsi" nə məqsəd daşıyır?
AQTA-dan bizim. media-nın sorğusuna cavab olaraq bildirildi ki, laborator müayinələrin bir qisminin cavabı var: "Nəticələr uyğun çıxıb, yaxşıdır, narahatlığa əsas yoxdur".
