Gəncə Apellyasiya Məhkəməsində xuliqanlıqda təqsirləndirilən Vüsal Cəbiyevin barəsindəki hökmdən verilən apellyasiya şikayəti üzrə məhkəmə prosesi başa çatıb.
Gencexeber.az-ın əldə etdiyi məlumata görə, hakim Nural Əliyevin sədrliyi ilə keçirilən prosesdə qərar elan edilib.
İttihama görə, hadisə 2023-cü ilin martın 14-də Gəncə şəhəri, Atatürk prospekti 237 ünvanında yerləşən 3 saylı yataqxananın qarşısında qeydə alınıb.
Belə ki, Vüsal Cəbiyev zərərçəkmiş İntiqam Kərimzadəni ətrafda toplaşan çoxsaylı insanların gözü qarşısında nalayiq ifadələrlə təhqir edib. Vüsal İntiqamı qonşuluqda yaşayan Aytən adlı qadına əxlaqsız təkliflər etməsini bəhanə edib. Bu zaman Vüsal yumruq zərbəsi ilə İntiqamı vurub. İntiqam Vüsalın əlindən qaçarkən təqsirləndirilən şəxs onu təqib edib. O, İntiqamın yerə yıxılmasından istifadə edərək ona təpik zərbələri endirib. Bu zaman zərərçəkmiş şəxsə müxtəlif dərəcəli bədən xəsarətləri yetirib.
Bundan başqa, Vüsal Cəbiyev ötən ilin martın 9-da yaşadığı Gəncə şəhəri, Yeni Gəncə massivi, 2-ci mikrorayonda yerləşən bina evinin dördüncü mərtəbəsindən özünü atmağa cəhd edib. Bu zaman ona mane olan polis əməkdaşlarına şərait yaradan Mahirə qarşı qəzəblənib. O, Mahirin köməkliyini özünə qarşı edilmiş hörmətsizlik kimi qəbul edib. Bunu bəhanə edərək heç bir əsaslı səbəb olmadan intihara cəhd zamanı polis əməkdaşlarına köməklik edən Mahirə döş qəfəsinə bıçaqla xəsarət yetirib. Hadisədən sonra Vüsal Cəbiyev saxlanılaraq cinayət məsuliyyətinə cəlb edilib. Gəncə Şəhər Məhkəməsinin hökmü ilə o, 2 il 6 ay müddətinə azadlıqdan məhrum edilib.
Gəncə Apellyasiya Məhkəməsinin qərarına əsasən, apellyasiya şikayəti təmin edilib, Gəncə Şəhər Məhkəməsinin hökmü ləğv olunub. Təqsirləndirilən şəxs əməlləri təqsirli bilindiyi Cinayət Məcəlləsinin 221.3-cü maddəsindən həmin Məcəllənin 128-ci maddəsinə tövsif edilib. Vüsal Cəbiyev zərərçəkmiş şəxslərlə barışdığına və onlara dəymiş ziyanı tamamilə ödədiyinə görə cinayət məsuliyyətindən azad edilib və barəsindəki cinayət təqibinə xitam verilib. Təqsirləndirilən şəxs barəsində seçilmiş həbs qətimkan tədbiri ləğv olunub və məhkəmə iclas zalında dərhal həbsdən azad edilib.
Qeyd edək ki, adlar şərti verilib.
Fidan İlqar
