Kafedə kişi dava zamanı bakalı tanışının başına vurub.
Gencexeber.az-ın məlumatına görə, hadisə Ağstafa şəhəri, Cəfər Cabbarlı küçəsində yerləşən “Şamlıq” restoranının həyətində qeydə alınıb.
Belə ki, Zabil Qurbanov həmin restoranda müştəri qismində olan tanışı, zərərçəkmiş Mahir İbadovdan yüksək səslə qulaq asdığı musiqinin səsinin azaldılmasını tələb edib. Mahir isə musiqinin səsini azaltmayacağını deyərək, onun ünvanına söyüşlər söyüb. Buna görə onlar arasında mübahisə yaranıb. Nəticədə Zabil Mahirlə əlbəyaxa olub, əvvəlcə təpiklə onun sinəsindən vurub. Zərbənin təsirindən Mahir yerə yıxılıb.
Daha sonra Zabil Mahirin ona söyüşlər söyməkdə davam etdiyini görüb stolun üstündən götürdüyü şüşə bakal ilə onun baş nahiyəsinə 2 dəfə vuraraq bədən xəsarətləri yetirib. Hadisədən sonra Zabil Qurbanov saxlanılaraq cinayət məsuliyyətinə cəlb edilib. Ağstafa Rayon Məhkəməsinin hökmü ilə o, 6 ay müddətə azadlığın məhdudlaşdırılması (elektron qolbaq) cəzasına məhkum edilib.
Hökmdən narazı qalan məhkum apellyasiya şikayəti verib. Qərara əsasən, Ağstafa Rayon Məhkəməsinin hökmü ləğv edilib. Cinayət işi birinci instansiya məhkəməsinə yeni məhkəmə baxışına göndərilib. Təqsirləndirilən şəxs barəsində seçilmiş polisin nəzarəti altına vermə qətimkan tədbiri isə dəyişdirilməyib. Qeyd edək ki, hər iki şəxsin adı şərti verilib.
