Gəncə futbol klubu bir neçə oyunu başqa meydanda keçirəcək. Bu haqda 18 mart tarixində Report-a istinadən xəbər veririk.
“Kəpəz”in cari mövsümün son 3 ev oyununun harada baş tutacağı bu həftə bəlli olacaq. Klubun İdarə Heyətinin sədri İlqar Nadirinin sözlərinə görə, rəhbərlik məsələ ilə bağlı tezliklə qərar verəcək.
Sədr onu da əlavə edib ki, Gəncə Şəhər Stadionunda görülən işlərin gedişatından məlumatsızdırlar.
“Stadion Gənclər və İdman Nazirliyinin tabeliyindədir. Nazirliyin nəzarəti altında işlər davam edir. Bu səbəbdən onlar daha ətraflı məlumat verə bilərlər. Bizim bazadan gördüyümüz qədər işlər gedir. Ancaq bunun hansı mərhələdə olduğunu bilmirik”, - deyə, o əlavə edib.
Qeyd edək ki, “Kəpəz” Premyer Liqanın XXVIII turunda “Qarabağ”la Tofiq Bəhramov adına Respublika Stadionunda görüşəcək. Daha sonra klubumuz XXXI turda “Sabah”ı, XXXIII turda “Sumqayıt”ı və XXXV turda “Zirə”ni qəbul edəcək. Həmin matçların məkanı hələlik məlum deyil.
