Gəncə Ağır Cinayətlər Məhkəməsində qətl törətməkdə təqsirləndirilən A.Abbasovun cinayət işi üzrə məhkəmə prosesi başa çatıb.
Pravda.аz xəbər verir ki, hakim Abdulla Məmmədovun sədrliyi ilə keçirilən prosesdə hökm oxunub.
Məhkəmənin hökmü ilə A.Abbasov 7 il 6 ay müddətinə azadlıqdan məhrum edilib.
İttihama görə, hadisə 2024-cü il oktyabrın 1-də, saat 19:20-də, Şəmkir rayonu, Mahmudlu kəndi, "ikinci küçə" yaxınlığında baş verib.
Belə ki, yetkinlik yaşına çatmayan, 2009-cu il təvəllüdlü A.Abbasov əvvəlki günlərdə aralarında yaranmış şəxsi münaqişəyə görə həmkəndlisi, zərərçəkmiş İlham Abdullayevdən qisas almaq niyyəti ilə evdə olan bıçağı götürərək görüşə gəlib. Görüş zamanı təqsirləndirilən şəxs İlham Abdullayevin özünə və ailəsinə qarşı nalayiq ifadələr işlətməsindən hiddətlənərək üzərindəki bıçaqla bir dəfə onun döş qəfəsinin sol arxa yan səthinə zərbə vurub. Nəticədə zərərçəkmişin sol ağciyəri və ürəyi zədələnib, kəskin qanitirmə ölümünə gətirib çıxarıb.
Beləliklə, təqsirləndirilən Abbasov şəxsi münasibətlər zəminində baş vermiş mübahisəyə görə qisas məqsədilə İlham Abdullayevi qəsdən öldürüb.
Hadisəni törətməkdə şübhəli bilinən A.Abbasov şübhəli şəxs qismində saxlanılıb.
