Şəmkirdə qohumlar arasında bıçaqlanma olub.
Gencexeber.az-ın əldə etdiyi məlumata görə, hadisənin istintaqı Gəncə Ağır Cinayətlər məhkəməsində keçirilib.
Belə ki, 1955-ci təvəllüdlü Nail Əliyev (ad şərtidir) Şəmkir rayonunda anadan olub. O, qaynı ilə 2 litr araq içdikdən sonra sərxoş halda Şəmkir rayonunda yaşadığı evə gəlib. Evdə telefonla danışaraq nalayiq ifadələr işlətdiyi üçün qaynı Əli Sultanov (ad şərtidir) ona irad bildirib. Aralarında mübahisə yaranıb. Bu zaman Əli Sultanov onu əli ilə itələyərək oturduğu stuldan yerə yıxıb. Bundan hiddətlənən Nail cibindəki bıçağı çıxararaq Əlini vurub.
Nail Əliyev Azərbaycan Respublikası CM-nin 126.1-ci (qəsdən sağlamlığa ağır zərbə vurma) maddəsi ilə təqsirləndirilib.
Məhkəmədə təqsirləndirilən şəxs qismində dindirilən Nail Əliyev özünü təqsirli bilib. İfadəsində göstərib:
“Əli ilə yeyib-içdikdən sonra aramızda anlaşılmazlıq oldu. Mübahisədən sonra aramızda problem yarandı və hadisənin necə olduğunu anlamadım. Hadisə günü mübahisənin hansı səbəbdən baş verdiyini, telefonla danışarkən də nalayiq ifadələr işlədib-işlətmədiyimi xatırlamıram”.
Daha sonra məhkəmədə zərərçəkmiş Əli Sultanov ifadə verib:
“Naillə birlikdə yeyib-içdikdən sonra birlikdə evə getdik. O, kiminləsə telefonla danışaraq nalayiq ifadələr işlətməyə başladı. Dedim ki, bacım evdədi, söyüş söymə. Bu zaman aramızda mübahisə yarandı, mən də Naili itələdim. İtələyən zaman Nail yerə yıxıldı. Onu yerdən qaldırmaq istəyəndə məni bıçaqla vurdu”.
Tərəflərin çıxışından sonra məhkəmə müşavirəyə yollanıb. Sonda məhkəmənin qərarı ilə Nail Əliyev 3 il müddətində azadlıqdan məhrum edilib.
Əsmər Sənani
