Xəbər verdiyimiz kimi, Yeni Gəncə qəsəbəsində yerləşən 19 saylı binanın 2-ci blokunun sakinləri 1 ildən artıqdır ki, ləng işləyən lift problemi ilə üzləşiblər. Lift yavaş-yavaş hərəkət edir və qapıları xeyli müddətdən sonra açılır.
Gencexeber.az-a sözügedən çətinliklə bağlı Gəncə şəhər Mənzil Kommunal Təsərrüfatı İstehsalat Birliyinin (MKTİB) mətbuat xidməti bildirib ki, liftə mütəxəssislər tərəfindən baxış keçirilib. Qurğunun işləməyində heç bir problem yoxdur:
“O biri liftlərlə müqayisədə sözügedən liftin qapıları texniki səbəbdən 15 saniyə gec açılır. Ancaq liftin işləməyində heç bir problem yoxdur və qurğunun sazlığı qaydasındadır”.
Qeyd edilib ki, həmin binanın 2-ci blokunda yaşayan sakinlərin bir çoxu liftdən gündəlik istifadə etsələr də, liftin istismar haqqının ödənilməsində maraqlı deyillər.
Həmin ünvanın sakinlərinin MKTİB-nə 283 manat borcu yaranıb. Baxmayaraq ki, şəhərimizdə lift xidmət haqqı hər bir nəfərə görə 1 ayda 20 qəpik təşkil edir.
