Noyabrın 15-dən Sevinc qəsəbəsində Aleksandr Abdullayev küçəsinin sakinləri susuz qalıb.
Gencexeber.az-a sözügedən məsələ ilə bağlı yerli sakinlərdən şikayət daxil olub. Onlar bildirirlər ki, 50-dən çox evdə su təchizatı dayandırılıb. “Azərsu” ASC-nin qaynar xəttinə zəng etmələrinə baxmayaraq, vəziyyət dəyişməyib.
Sakinlərin sözlərinə görə, qurumun yerli şöbəsinin əməkdaşı fasiləni bəzi istehlakçıların su haqqını ödəməməsi ilə izah edib.
Qeyd edək ki, qəsəbədə su təchizatı ilə bağlı problemlər nadir deyil: ərazidə bu cür hallar tez-tez baş verir və bir qayda olaraq, günlərlə davam edir.
