Bu gün SSRİ Xalq artisti, Dövlət mükafatı laureatı Leyla Bədirbəylinin doğum günüdür.
Gencexeber.az xatırladır ki, Azərbaycan teatrının inkişafında xüsusi xidmətləri olan Leyla Bədirbəyli 1920-ci il yanvar ayının 8-də anadan olub.
Bəzi mənbələrdə onun Bakıda, bəzilərində isə Şəmkirdə dünyaya göz açdığı qeyd olunur.
Onun anası Bikə xanım Şəmkirin Dəllər kəndində Musa xanın qızı, atası Ağalar bəy isə həmin bölgənin kənd bəylərindən olub.
Aktrisa uşaq yaşlarından rəqsə böyük maraq göstərib. Onda incəsənətə olan sevgi anası Bikə xanımın Əli Bayramov klubundakı qadınlar dərnəyinin rəqs bölməsinə yazdırması ilə yaranıb. 15 yaşından Filarmoniyada solist kimi fəaliyyət göstərməyə başlayan Leyla ilk dəfə özünü kino aktrisası kimi operator Dziqa Vertovun “Lenin haqqında üç mahnı” sənədli filmində pioner qız rolunda sınayıb.
1941-ci ildə Azərbaycan Dövlət Akademik Dram Teatrına dəvət olunan Leyla Bədirbəyli bununla da, Azərbaycan teatrının inkişafına töhfələr verməyə başlayıb. Onun teatrda ilk çıxışı Mirzə İbrahimovun “Məhəbbət” tamaşasında Zəhra rolu olub. Bu uğurlu rolu müqabilində o, teatr səhnəsində bir çox tamaşalarda baş rollarda yer alıb.
Səhnə həyatında bir çox uğurlara imzalar atan Leyla Bədirbəylinin fəaliyyəti yüksək qiymətləndirilib: sənətkar “Azərbaycan SSR Xalq artisti”, “SSRİ Xalq artisti”, Azərbaycan SSR Dövlət Mükafatları laureatı fəxri adlarına layiq görülüb.
Ölkəmiz müstəqillik qazandıqdan sonra Leyla Bədirbəylinin milli teatr və kinodakı fəaliyyəti “Azərbaycanfilm” kinostudiyasının aktyor şöbəsində işləyən istedadlı gənclərin inkişafı yoluna da işıq salıb. Azərbaycan incəsənətinə, mədəniyyətinə öz yaradıcılıq töhfəsini verən Leyla Bədirbəyli Azərbaycan kinosunun inkişafındakı fədakar xidmətinə görə dövlətimiz tərəfindən “İstiqlal” ordeni ilə təltif olunub.
Milli kino sənətimizin bənzərsiz simalarından biri olan Leyla Bədirbəyli 1999-cu il noyabr ayının 23-də Bakı şəhərində vəfat edib və Fəxri xiyabanda dəfn olunub.
