Xəbər verdiyimiz kimi, Gəncənin 4-cü mikrorayon ərazisində yerləşən Musa Xələfov küçəsi 1 ünvanındakı doqquzmərtəbəli binada liftlərin nasazlığı sakinlərin narazılığına səbəb olub.
Gencexeber.az-ın sorğusuna cavab olaraq Mənzil Kommunal Təsərrüfatı İstehsalat Birliyindən (MKTİB) bildirilib ki, binadakı liftlərin təmir-bərpa işləri “Lift Servis” MMC tərəfindən həyata keçirilir. Qurum qeyd edib ki, MMC öz fəaliyyətini sakinlərdən toplanan aylıq lift haqqı ilə formalaşdırır və təmir işləri də bu vəsaitlər hesabına aparılır.
MKTİB-dən verilən məlumata görə, adıçəkilən ünvanda təmirə ehtiyacı olan lift sakinlərin borcu olmasına baxmayaraq, yenidən işlək vəziyyətə gətiriləcək: “Həmin ünvanda yaşayan sakinlərin lift xidmətinin borcu 552 manat 30 qəpik təşkil edir. Başqa xidmətlərə görə isə MKTİB-ə ümumi 2457 manat borc yaranıb”.
Məlumatda qeyd olunub ki, lift xidmətindən istifadə edən 14 mənzildən yalnız ikisinin heç bir borcu yoxdur. Qurum sakinləri ayda cəmi 20 qəpik olan lift haqqını vaxtında ödəməyə çağırıb:
“Nazirlər Kabinetinin qərarına uyğun olaraq aylıq lift xidməti hər sakinə görə 20 qəpik təşkil etsə də, əksər sakinlər bu cuzi xidmət haqqını verməkdən boyun qaçırırlar”.
