Gəncə Şəhər İcra Hakimiyyəti, Mədəniyyət Nazirliyinin Gəncə-Daşkəsən Regional Mədəniyyət İdarəsi, "Bakı Abadlıq Xidməti" və Azərbaycan Fotoqrafları Birliyinin (AFB) təşkilatçılığı ilə Gəncə şəhərində unikal bir mədəniyyət tədbiri – "Əsrlərin şahidi Gəncə" adlı foto sərgi keçiriləcək.
Gencexeber.az bildirir ki, tədbir sabah Gəncə Dövlət Filarmoniyasının Urban Mərkəzində baş tutacaq və şəhərin tarixi keçmişini, köhnə və yeni fotolar vasitəsilə zamanın izlərini əks etdirəcək.
Sərgidə Gəncənin müxtəlif dövrlərdə çəkilmiş fotoşəkilləri nümayiş olunacaq.
Sərgi çərçivəsində tamaşaçılar üçün xüsusi olaraq "Gəncə tarixinin cizgiləri" adlı film də nümayiş olunacaq. Film qədim fotolara yeni həyat verərək, şəhərin keçmişini müasir vizual texnologiyalar vasitəsilə canlandırır və Gəncənin zəngin mədəni irsini daha dərindən tanıtmağı hədəfləyir.
