Gəncədə növbəti ölkənin nümayəndəliyi fəaliyyətə başlayıb. Bu haqda 20 aprel tarixində AzTV-yə istinadən məlumat veririk.
Nizami yurdunda Özbəkistan Respublikasının Konsulluğunun açılışı baş tutub. Burada şəhər rəhbəri Niyazi Bayramov, Türkiyənin Gəncədəki Baş Konsulu Recep Öztop, şəhər ictimaiyyəti və digər rəsmilər iştirak ediblər.
Konsulluq respublikamızın qərb bölgəsində yaşayan Özbəkistan vətəndaşlarının işini asanlaşdıracaq. Həmçinin sözügedən ölkədən Azərbaycana investisiyaların cəlb edilməsi üzrə işlərin aparılması nəzərdə tutulur.
“Azərbaycanda bizim əsas fəaliyyətimiz ticarət, mədəni əlaqələr və birgə sənaye zonalarını inkişaf etdirməkdir. Əsasən də, Gəncədə bildiyinizə görə, öncədən tekstil, xalçaçılıq olub. Ona görə biz istəyirik ki, onu inkişaf etdirək. Çünki bugünkü gündə Özbəkistanda pambığın istehsalı və xalçaçılıqda böyük bir inkişaf gedir. Onlarda olan həmin o potensialı Azərbaycana gətirmək istəyirik”, - deyə Özbəkistan Respublikasının şəhərimizdəki Fəxri Konsulu Kənan Cəlilov bildirib.
