Gəncə sakininə qarşı dələduzluq edilib. Bu haqda 15 mart tarixində Oxu.az-a istinadən məlumat veririk.
Ötən ilin əvvəlində şəhər sakini Elnur Abbasov iki dostundan iş təklifi alıb. Həmin şəxslər ona işləmək üçün “Asan imza” almasının vacib olduğunu deyiblər. Abbasov “Asan imza”nı əldə edəndən sonra bütün sənədlərin şifrəsini dostlarına verib. Bir müddət keçəndən sonra Elnurun dostları ona işin alınmadığını bildiriblər.
Bu ilin əvvəlində isə şəhər sakininə vergi xidmətindən bildiriş gəlib. Burada Abbasovun adına 5 şirkətin olduğu və 33 min manatdan çox borcun yarandığı əks olunub.
Zərərçəkmiş həmin şirkətlərin ünvanını öyrənməyə çalışsa da, qurumdan bu məlumatın məxfi olduğu bildirilib. O, faktla bağlı prokurorluq orqanlarına müraciət edib.
Dövlət Vergi Xidmətindən verilən məlumata əsasən, qanunvericiliyə görə, elektron imza yalnız sahibinə məxsusdur. Qanunu bilməmək heç kimi məsuliyyətdən azad etmir.
Belə halla rastlaşan vətəndaşlar araşdırılması üçün hüquq-mühafizə orqanlarına müraciət edə bilərlər.
