Xəbər verdiyimiz kimi, Moskvadakı Vnukovo hava limanından Gəncəyə uçmalı olan sərnişin təyyarəsi 25 saatdır gecikir.
Gencexeber.az məlumat verir ki, "UTAİR" aviaşirkətinə məxsus olan və iyulun 20-si saat 05:40-da havaya qalxmalı olan Moskva–Gəncə reysi əvvəlcə təxminən 20 saat gecikib, daha sonra isə ləğv olunub. Lakin sonradan Vnukovo hava limanı əvvəlki məhdudiyyətlərin aradan qalxdığını və hava limanının normal fəaliyyətini bərpa etdiyini açıqlayıb.
Hazırda gecikmiş reysin yola salınması üçün hazırlıqlar aparılır.
14:00
Rusiyanın paytaxtı Moskvada yerləşən Vnukovo hava limanından Gəncə şəhərinə çıxmalı olan reys 25 saatdır ki yubanır.
Baku.ws-ə bu barədə Azərbaycana gəlməli olan həmyerlilərimizdən biri məlumat verib.
O bildirib ki, "UTAİR" aviaşirkətinə məxsus, ötən gün saat 05:40-da havaya qalxmalı olan Moskva-Gəncə reysi 20 saata yaxın gecikib, daha sonra isə ləğv olunub. Hazırda sərnişinlər hava limanında qalır və onlara dəqiq məlumat verilmir:
"Bizə deyirlər ki, Gəncə sizi qəbul etmir. Ancaq bilirik ki, bu yalan xəbərdir. Gəncə hava limanı ilə də danışdıq, ordan da deyildi ki, Moskva tərəfi sizi buraxmalıdır. Biz tərəfdən bir problem yoxdur. İndi də Vnukovodan deyirlər ki təyyarədə problem var. Bizə burada pis rəftar edirlər, üstəlik heç bir nümayəndə suallarımızı cavablandırmır", - deyə şikayətçi vurğulayıb.
