Rusiya-Ukrayna müharibəsində Gəncə şəhərinin daha bir sakini həyatını itirib.
Gencexeber.az-ın əldə etdiyi məlumata görə, Məmmədli Qoşqar Şakir oğlu 2024-cü ilin dekabrın 2-də imzaladığı müqavilə əsasında Rusiya ordusuna cəlb olunub. O, Rostov şəhərində yerləşən hərbi hissələrin birində xidmətə başlayıb.
Ailəsi Qoşqardan sonuncu dəfə 2025-ci il yanvarın 6-da xəbər ala bilib. Onun döyüş yoldaşı martın 18-də ailəyə bildirib ki, Qoşqar Ukraynanın Donetsk vilayətində döyüşlərə qatılıb və həmin döyüşdən geri qayıtmayıb.
Onun nəşi doğma Gəncə şəhərinə bir neçə gün öncə gətirilərək Yeni Səbiskar qəbiristanlığında torpağa tapşırılıb.
Mərhum 1987-ci il may ayının 1-də Gəncədə dünyaya gəlib. Evli olan kişinin iki övladı var.
Qeyd edək ki, bu, son aylarda Rusiya-Ukrayna müharibəsində həyatını itirən azərbaycanlılarla bağlı qeydə alınan növbəti hadisədir. Onların arasında üç Gəncə sakininin adları da var - 37 yaşlı Şahmar Mustafayev, 39 yaşlı Anar Quliyev və 41 yaşlı Ruhin Museyibov.
Xatırladaq ki, Goranboy rayonunun Borsunlu kənd sakini Əliquluyev Şəhruz videoçarx çəkərək Azərbaycan Respublikasının Prezidenti cənab İlham Əliyevə və ölkə ictimaiyyətinə müraciət edib. O, müraciətində aldadılaraq müharibəyə cəlb olunduğunu bildirib və mövcud vəziyyətdən xilas olmaq üçün kömək istəyib.
