Goranboy rayonunun Borsunlu kənd sakini Əliquluyev Şəhruz İsrayıl oğlu aldadılaraq Rusiya silahlı qüvvələrinin sıralarına cəlb edilib.
Bu barədə iddialar Gencexeber.az-a həmin şəxsin yaxınları tərəfindən səsləndirilib.
Bildirilib ki, oxumağı və yazmağı bacarmayan 1985-ci il təvəllüdlü şəxsə iş vəd olunub, daha sonra qarşısına müharibəyə qatılmaqla bağlı sənəd qoyulub. Lakin bu barədə ona məlumat verilməyib.
İddialara görə, "işə" qəbul üçün sənəd adı ilə təqdim olunan müqaviləni anlamadan imzalayan Şəhruz sonradan Rusiya ordusuna cəlb edilib.
Yaxın dostu tərəfindən Rusiyaya aparılan Şəhruzun artıq 15 gündür poliqonda olduğu deyilir. Bildirilir ki, onun üç gün sonra müharibəyə göndərilməsi gözlənilir.
Ş.Əliquluyev məsələ ilə bağlı videoçarx çəkərək Azərbaycan Respublikasının Prezidenti cənab İlham Əliyevə və ölkə ictimaiyyətinə müraciət edib. O, müraciətində aldadılaraq müharibəyə cəlb olunduğunu bildirir və mövcud vəziyyətdən xilas olmaq üçün kömək istəyir.
Qeyd edək ki, Ş.Əliquluyev ailəlidir və iki övladı var.
