Ukraynada gedən döyüşlərdə iştirak edən azərbaycanlıların aqibəti ilə bağlı narahatedici xəbərlər səngimək bilmir.
Gencexeber.az-ın əldə etdiyi məlumata görə, Tovuz rayonunun Aşağı Quşçu kənd sakini, 1986-cı il təvəllüdlü Qələndərov Müzəddin Rəhman oğlu bir neçə ildir işləmək məqsədilə Rusiya Federasiyasına gedib və orada ordu sıralarına cəlb edilib.
Məlumata əsasən, o, Rusiyanın Yurqa şəhərində yerləşən hərbi hissənin tərkibində mühəndis-saper kimi xidmət edib. Qələndərov döyüş yoldaşları arasında "Mexanik" ləqəbi ilə tanınıb.
Sonuncu dəfə 15 fevral 2024-cü il tarixində Ukraynanın Donetsk vilayətinin Şevçenko yaşayış məntəqəsi istiqamətində döyüş tapşırığına yollandıqdan sonra ondan heç bir xəbər alınmayıb.
Ailəsi və yaxınları bu gündən etibarən onunla əlaqə saxlaya bilmədiklərini bildirirlər. Tovuzda doğulub boya-başa çatan Müzəddin Qələndərovun itkin düşməsi ailəsini və kənd sakinlərini dərin sarsıntıya salıb.
