Gəncədə növbəti məktəb yenidən tikilib. Bu haqda 10 fevral tarixində Kəpəz televiziyasına istinadən məlumat veririk.
Söhbət 29 nömrəli tam orta məktəbdən gedir. İkinci Qarabağ müharibəsi zamanı ermənilərin Gəncəyə atdığı raket təhsil ocağını yararsız hala salmışdı. Bu səbəbdən məktəb yenidən inşa edilərək sakinlərin istifadəsinə verilib.
Hazırda 29 nömrəli tam orta məktəbin bütün sinif otaqları əvvəlkindən fərqlidir: həm avadanlıqlar, əyani vəsaitlər, həm də interyer baxımından. Artıq şagirdlər və müəllimlər məktəbin təmirli 37 sinfində tədrisə davam edirlər. Yenidən tikilən bina 960 yerlik olduğundan 1068 şagirdin dərslərdə iştirakını təmin etmək üçün tədris ikinövbəli təşkil olunub. Burada fizika, kimya və biologiya laboratoriyaları və 3 STEAM otağı yaradılıb. Həmin kabinetlərdə uşaqlar 3D printerlərdən modellər düzəldəcəklər.
Qeyd edək ki, 5 ildə şəhərimizdə 5 məktəb tikilib və ya əsaslı təmir edilib.
