Gəncədə yoluxucu xəstəliklərin yayılmasını azaltmaq üçün müvafiq işlər görülür. Bu haqda 25 dekabr tarixində Kəpəz televiziyasına istinadən məlumat veririk.
Şəhər ərazisində qızılca virusuna yoluxma halları artıb. Bildirilir ki, 80-ə yaxın sakin bu xəstəlikdən müalicə alır. Yoluxanların çoxu stasionar qaydada Yoluxucu Xəstəliklər Xəstəxanasına yerləşdiriliblər. 15 uşaq isə Ailə Sağlamlıq Mərkəzlərində qeydiyyata alınaraq ambulator qaydada müalicəyə cəlb olunub.
Bundan başqa, dekabrın əvvəlindən indiyə kimi şəhərimizdə 1900 uşaq peyvənd olunub.
Qızılcaya yoluxma qeydə alınan məkanlarda dezinfeksiya işləri də aparılır. 13 məktəb, 6 bağça, 1 universitet və 2 yataqxanada sözügedən işlər həyata keçirilib.
