Gəncədə avtomobili sərxoş vəziyyətdə idarə edən sürücü inzibati həbs edilib. Bu haqda 12 fevral tarixində Report-a istinadən xəbər veririk.
Dövlət Yol Polisi Şöbəsinin əməkdaşları tərəfindən hərəkətin təhlükəsizliyinin təmin edilməsi məqsədilə nəzarət-yoxlama tədbirləri keçirilib. Nəticədə şəhər sakini, “VAZ-2107” markalı avtomobilin sürücüsü Amil Şərifov saxlanılıb. Ona yol hərəkəti qaydalarını pozduğu üçün inspektor tərəfindən “saxla” işarəsi verilib.
Yoxlama zamanı həmin şəxsin sərxoş olduğu aşkarlanıb. Həmçinin avtomobilin ön yan şüşələrinə tündləşdirilmiş örtük yapışdıran sürücünün il ərzində bir dəfə də sərxoş halda avtomobil idarə etdiyinə görə barəsində inzibati tədbir görülməsi və sürücülük hüququndan məhrum olması məlum olub. Amil Şərifov barəsində protokol tərtib olunaraq məhkəməyə göndərilib və məhkəmənin qərarı ilə o, 15 sutka müddətinə inzibati qaydada həbs edilib.
Bundan başqa, monitorinqlər zamanı bir qrup gəncin avtomobillərinə qadağan olunmuş konstruksiya dəyişikliyi edərək digər hərəkət iştirakçılarına təhlükə yaratdığı məlum olub. Onlar saxlanılaraq hər biri ilə profilaktiki söhbət aparılıb və barələrində qanunamüvafiq tədbir görülüb. Qanunsuz dəyişikliklər aradan qaldırıldıqdan sonra nəqliyyat vasitələri istismara buraxılıb.
