Gəncədə qəzalı binaların sayı açıqlanıb. Bu haqda 6 mart tarixində Report-a istinadən məlumat veririk.
Nazirlər Kabinetinin 2023-cü il üzrə fəaliyyəti haqqında hesabat hazırlanıb. Məlumata əsasən, aidiyyəti dövlət orqanlarının nümayəndələrindən ibarət işçi qrupu yaradılıb. Məqsəd şəhərimizdəki qəzalı olan çoxmənzilli yaşayış binalarını texniki cəhətdən təhlükəlilik vəziyyətinə görə prioritetləşdirməklə tərtib edilmiş siyahılar üzrə görüləcək tədbirlərin sistemləşdirilməsidir. Həmin işçi qrupu tərəfindən təkliflərin hazırlanması ilə bağlı işlər aparılır.
Bildirilib ki, Fövqəladə Hallar Nazirliyi tərəfindən Gəncədə 768 mənzili olan 11 yataqxana binasına baxış keçirilib. Onların texniki cəhətdən qəzalı vəziyyətdə olduğu barədə müvafiq aktlar tərtib edilərək həmin siyahıya daxil edilib.
Nazirlər Kabinetinin tapşırığına əsasən, Dövlət Şəhərsalma və Arxitektura Komitəsi tərəfindən aidiyyəti qurumların iştirakı ilə "Qəzalı və yolverilməz vəziyyətə düşmüş çoxmənzilli yaşayış binalarının yenilənməsinə və əsaslı təmirinə dair Dövlət Proqramı" hazırlanıb. Bildirilir ki, bu layihənin təsdiqlənməsi yekun mərhələdədir.
