Tovuzda qonşusunun pişiyinə görə Daxili İşlər Nazirliyinin "102” xidmətinə zəng edən şəxs həbs edilib.
Qaynarinfo.аz xəbər verir ki, 1973-cü ildə Tovuz rayonunda anadan olmuş Əli Vəliyev (ad şərtidir - red.) barəsində İnzibati Xətalar Məcəlləsinin 510-cu və 535.1-ci maddələri ilə protokol tərtib edilib və işə məhkəmədə baxılıb.
Məlum olub ki, Vəliyev 12 avqust 2025-ci il tarixdə evdə olarkən spirtli içki qəbul edib. Daha sonra qonşuluqda yaşayan Xaliq Həsənlinin (ad şərtidir - red.) pişiyinin səsi onu narahat etməyə başlayıb. Bu səbəbdən də "102" xidmətinə zəng edib.
Əli Vəliyev spirtli içkinin təsiri altında həm qaynar xətt xidmətində olan əməkdaşla danışarkən, həm də çağırışa gələn polis əməkdaşlarının yanında ucadan ünvansız nalayiq ifadələr işlədib.
Sərxoş olduğu üçün hərəkətlərindən xəbərsiz olduğunu deyən Vəliyev bir daha belə hərəkətlərə yol verməyəcəyini bildirib, peşmançılığını və anasının xəstə olmasını nəzərə almağı, ona yüngül inzibati tənbeh verilməsini məhkəmədən xahiş edib.
Məhkəmənin hökmü ilə Əli Vəliyev İnzibati Xətalar Məcəlləsinin 510 və 535.1-ci maddələrində nəzərdə tutulmuş inzibati xətanı törətməkdə təqsirli bilinib və 10 gün müddətinə həbs olunub.
