İranda səfirliyə hücum zamanı həlak olan gəncəli şəhidin atası danışıb. Bu haqda 6 fevral tarixində Qafqazinfo-ya istinadən məlumat veririk.
İran hökumətinin ötən il Azərbaycanın səfirliyinə silahlı hücum edərək qətl törədən şəxsə ölüm hökmünün verilməsinə dair xəbərlər yayılıb. Hadisə nəticəsində həlak olan səfirliyin mühafizə xidmətinin rəisi, baş leytenant Orxan Əsgərovun atası Rizvan Əsgərov bu məlumata münasibət bildirib. O, belə bir qərar olarsa, bunun ədalətli olacağını deyib.
“Bu xəbəri biz də eşitdik. Amma nə qədər həqiqətə uyğundur, bilmirik. Bu qərar verilsə, ədalətli olar. Orxanın qanı yerdə qalmaz”, - deyə mərhumun atası qeyd edib.
Xatırladaq ki, hadisə 27 yanvar 2023-cü ildə baş vermişdi. Səfirliyimizə basqın edən şəxs “Kalaşnikov” markalı avtomat silahla Orxan Əsgərovu qətlə yetirmişdi. Səfirliyin iki mühafizə əməkdaşı isə hücumun qarşısını alarkən yaralanmışdı.
