Gəncədə qətl törədən şəxslərə hökm oxunub. Bu haqda 19 yanvar tarixində Oxu.az-a istinadən xəbər veririk.
84 yaşlı Nadejda Dmitriyevna Nəzərlini qətlə yetirən şəxslərin məhkəmə prosesi başa çatıb. İllər sonra üstü açılan cinayət hadisəsinə görə 38 yaşlı Seymur Mehman oğlu Salayev və dostu Şəhriyat Usaməddin oğlu Qirinə hökm oxunub. Onlar 13 il müddətinə azadlıqdan məhrum ediliblər.
Adıçəkilən şəxslər 13 may 2008-ci il tarixində qadının yaşadığı evin qarşısına gəlib onu aldadaraq evinə daxil olublar. Qarşılıqlı söhbət edən zaman planlaşdırdıqları özgənin əmlakını talama cinayətinin törədilməsini yüngülləşdirmək məqsədilə Şəhriyat Qirin iki əli ilə Nadejdanın ağzından tutaraq özünə doğru çəkib, digər şəxs isə üzərində olan bıçaqla onun boğaz nahiyəsinə çoxsaylı xəsarətlər yetirməklə qəsdən öldürüb. Qadını öldürdükdən sonra cinayətkarlar evdə axtardıqlarını tapa bilməyiblər.
Qeyd edək ki, Nadejda Dmitriyevna Nəzərli Azərbaycanda Rus İcmasının Qərb bölgəsi üzrə nümayəndəliyinin sədr müavini olub. Şəhriyat Qirin isə onun köməkçisi kimi fəaliyyət göstərib.
Şəhriyat Qirin şübhə yaratmamaq üçün keşişin köməkçisi kimi qadının dəfnində də iştirak edib.
