Oğlan anasının pul qarşılığında kişilərlə görüşdüyünü eşidib boğazını kəsdi.
Gencexeber.az bildirir ki, ittihama görə, hadisə bu il aprelin 7-də Goranboyun Tatarlı kəndində qeydə alınıb. Kənd sakini, 2005-ci il təvəllüdlü Şahin Əmrahovun atası 10 il qabaq avtomobil qəzasında dünyasını dəyişib.
Bir gün Şahin yaşadığı evə gələrək anasının telefon danışığını eşidib. Məlum olub ki, anası, 1975-ci il təvəllüdlü Alidə Kazımova telefonda rəfiqəsi ilə danışır. Danışıq zamanı qadın rəfiqəsinə "həyat yoldaşım dünyasını dəyişəndən sonra həyatımda 3-4 kişi olub, mən pullu kişilərlə münasibət qurmuşam" sözlərini eşidib. Telefon danışığı bitəndən sonra Şahin Əmrahov evə daxil olaraq, anasından hansı kişilərlə münasibətdə olduğunu soruşub və onunla mübahisə edib. O, bəzi vaxtlarda anasının telefonuna çoxlu zənglər və mesajlar gəlməsinə şahid olmuş, lakin öz-özünə "anamdır, yəqin pis iş görməz" deyə düşünmüşdür.
Alidə Kazımova isə oğluna məhəl qoymayaraq, heç bir kişi ilə münasibətdə olmadığını bildirib. Əsəbiləşən Şahin mətbəxdən bıçağı götürərək anasına ardıcıl zərbələr endirib. Bununla sakitləşməyən Şahin anasının boğazını kəsərək onu qətlə yetirib. Anasının ölümünə tam əmin olan oğlan evdən çıxaraq qəbiristanlığa gedib və orada atasının məzarını ziyarət edib.
Ardınca qardaşına hadisə barədə məlumat verdikdən sonra Goranboy Rayon Polis Şöbəsinə gedərək təslim olub. Məhkəmə istintaqı zamanı məlum olub ki, 8-9 il əvvəl oğlanları Alidə Kazımovanın başqa kişi ilə mesajlarını görüblər. Gəncə Ağır Cinayətlər Məhkəməsində anasını qətlə yetirməkdə təqsirləndirilən Şahin Əmrahovun cinayət işi üzrə məhkəmə prosesi başa çatıb.
Məhkəmənin hökmü ilə Şahin Əmrahov 10 il 6 ay azadlıqdan məhrum edilib.
