Xəbər verdiyimiz kimi, Gəncə şəhərində yerləşən Nizami kinoteatrının ətraf ərazisi ötən ilin sonlarında aparılan quruculuq və abadlıq işləri çərçivəsində əsaslı şəkildə təmir olunsa da, quraşdırılmış işıqlandırma sistemi fəaliyyət göstərmirdi.
Gencexeber.az-ın məlumatına görə, vətəndaşların haqlı narazılığı nəzərə alınaraq aidiyyəti qurum tərəfindən məsələ ilə bağlı tədbir görülüb. Belə ki, gecələr qaranlığa qərq olan istirahət guşəsində artıq işıqlandırma təmin edilib. Ərazidə bu məqsədlə quraşdırılan bütün qurğular müntəzəm şəkildə işə salınır.
Qeyd edək ki, əvvəllər baxımsız və tərk edilmiş ərazini xatırladan sözügedən istirahət guşəsində genişmiqyaslı yenidənqurma işləri aparılıb. Burada yol örtüyü tamet daşlarla döşənib, yeni oturacaqlar quraşdırılıb, əraziyə ağac və gül kolları əkilib.
