Gəncəli müğənni avtomobil kolleksiyasını təqdim edib. Bu haqda Gencexeber.az 16 aprel tarixində məlumat verir.
Söhbət “Navai” adı ilə tanınan Nəvai Bəkirovdan gedir. MDB ölkələrində məşhur olan müğənni “YouTube” kanalında yayımlanan “Po Qarajam” (“По Гаражам”) layihəsinin ilk qonağı olub. Burada ifaçı bir neçə il boyunca taksi fəaliyyəti göstərdiyi zaman sürdüyü avtomobilini nümayiş etdirib.
“Bu, “Nissan Almera”dır. Avtomobil 2006-cı il buraxılışıdır və mexanikadır. Bu avtomobildə mən 4 il taksi fəaliyyəti ilə məşğul olmuşam. Günlər olub ki, içində yatmışam. Bu nəqliyyat vasitəsini alanda çox pis vəziyyətdə idi. Avtomobili normal hala gətirmək üçün həm daxildən, həm də xarici görünüşünə əl gəzdirmişəm. Disklərinə qədər dəyişdirmişəm. Bu maşınla 223 min kilometr yol qət etmişəm. Onu alanda 50-60 min “probeq”i var idi. Konsert verməyə başlayanda düşündüm ki, ilk avtomobilimi satım. Amma sonra bu fikrimdən daşındım. Hazırda avtomobili qarajımda göz muncuğu kimi qoruyub saxlayıram”, - deyə qeyd edib.
Qeyd edək ki, Nəvai avtomobil kolleksiyasının 5 milyon 600 min manat dəyərində olduğunu bildirib.
