Gəncə şəhəri ərazisində narkotiklərin qanunsuz dövriyyəsi ilə məşğul olan şəxslərin tutulması barədə işlər davam etdirilir. Bu haqda 5 mart tarixində Daxili İşlər Nazirliyinə istinadən xəbər veririk.
Baş Polis İdarəsi Narkotiklərlə Mübarizə Bölməsinin əməkdaşları daha bir əməliyyat-axtarış tədbirləri keçiriblər. Nəticədə İran İslam Respublikasından qeyri-qanuni yolla ölkə ərazisinə gətirilmiş narkotik vasitənin ölkə ərazisində çatdırılmasını təmin etmək istəyən Samux rayon sakini Elşən Xəlilov saxlanılıb. Onun əlindəki çantadan qara bazarda qiyməti 500.000 manata yaxın olan 14 kiloqram 926 qram çəkidə narkotik vasitə olan heroin aşkar edilərək götürülüb.
Həmçinin polis əməkdaşları tərəfindən şəhər sakini Yaşar Abbasov saxlanılıb. Həmin şəxsin əlindəki çantadan 18 kiloqram 400 qram çəkidə qurudulmuş marixuana aşkar edilib. Şübhəli şəxs narkotik vasitənin ona aid olmasını, bir müddət əvvəl gizlətdiyi yerdən götürüb Gəncə şəhərinə gətirdiyini etiraf edib.
Bundan başqa, qanunsuz olaraq, narkotik vasitə əldə edib saxlamaqda və satmaqda şübhəli bilinən 20-yə yaxın şəxs saxlanılıb. Saxlanılan hər bir şəxsin üzərində, avtomobillərində, yaşadıqları evlərdə və digər yerlərdə axtarış aparılıb. Nəticədə müxtəlif çeşidli narkotik vasitələr və güclü təsiredici gücə malik narkotik maddələr aşkar edilərək götürülüb.
[modula id="55908"]
