Göygöl rayonunda məktəb inşa edilir.
Gencexeber.az-ın məlumatına görə, Elm və Təhsil Nazirliyinin sifarişi ilə “Rövşən Oğuz Mühəndislik” MMC tərəfindən Topalhəsənli kəndində yerləşən Elzam Bayramov adına tam orta məktəb yenidən tikilir. Əraziyə 50-yə yaxın işçi cəlb olunub. Artıq idman zalının inşası yekunlaşmaq üzrədir.
Ərazisi 1 hektara yaxın olan məktəb 3 korpusdan ibarət olacaq. Orada 20 sinif otağı ilə yanaşı kimya və fizika laboratoriyaları, eləcə də informatika, qız və oğlan şagirdlər üçün əmək təlimi otaqları fəaliyyət göstərəcək.
Sentyabr ayının sonunadək betonlama işlərinin tamamlanması, ilin sonuna isə məktəb binasının istifadəyə verilməsi planlaşdırılır.
Qeyd edək ki, Göygöl rayonunun Topalhəsənli kəndində yerləşən Elzam Bayramov adına tam orta məktəb 1936-cı ildə inşa olunub. Təhsil ocağı sonuncu dəfə 2004-cü ildə əsaslı təmir edilib.
2017-ci ildə məktəbdə aparılan tikinti işləri zamanı binanın bir hissəsi sökülüb, lakin işlər yarımçıq qalıb. Uzun fasilədən sonra, 2024-cü ilin may ayından etibarən məktəbdə yenidən tikinti işlərinə başlanılıb.
