Gəncənin Məhsəti qəsəbəsində yerləşən yaşayış massivlərindən birində əhali illərdir mavi yanacaq problemindən əziyyət çəkirlər.
Gencexeber.az-a müraciət edən sakinlərin sözlərinə görə, ərazidə nə küçənin adı var, nə də burada yaşayan insanlarla maraqlanan. Bildirilir ki, təxminən 20-dən çox ailə bu günədək təbii qazla təmin olunmayıb və 21-ci əsrdə qazsız yaşamaq məcburiyyətində qalıb.
Şikayətçilərin sözlərinə əsasən, bəzi ailələr məcbur qalıb elektrik cihazlarından istifadə edir, digərləri isə qış aylarında və şaxtalı havalarda odun tədarükü görür. Hər iki seçim isə sakinlərə maddi baxımdan baha başa gəlir.
Qeyd olunur ki, Məhsəti qəsəbəsi Gəncənin ən iri yaşayış massivlərindən biridir. Ərazinin bir hissəsi mavi yanacaqla təmin olunsa da, digər hissəsində bu problem hələ də qalmaqdadır. Sakinlər bildirirlər ki, evləri vaxtilə sərəncamla tikilib. Lakin indi onlara qaz xəttinin çəkilməsinin mümkün olmadığı deyilir.
Məsələ ilə bağlı Gencexeber.az-a "Azəriqaz" İB-nin İctimaiyyətlə əlaqələr şöbəsinin əməkdaşı Novruz Məmmədzadə bildirib ki, problem həllini tapacaq, ancaq işlər mərhələli şəkildə həyata keçiriləcək:
"Qazlaşma proqramı SOCAR-ın, "Azəriqaz" İB-nin daxili maliyyə imkanlarına uyğun olaraq mərhələli şəkildə həyata keçirilir. Gəncə şəhəri Məhsəti qəsəbəsi qazlaşdırılmış yaşayış məntəqəsidir. Sözügedən ərazi isə yeni yaşayış massividir. Yəni burada yerləşən fərdi yaşayış evləri sonradan tikilib. Həmin yaşayış məntəqəsinə qazın çəkilişinə növbəti mərhələlərdə baxıla bilər".
Hələlik isə görünən odur ki, sakinlər bir qədər də gözləməli olacaqlar. Qış mövsümü artıq başa çatmaq üzrədir. Ümid qalır ki, ən azı gələn qışa qədər bu problem öz həllini tapacaq.
