Gəncədə Avropa çempionları şəhərimizin qonaqları olublar. Bu haqda 7 mart tarixində Regional Təhsil İdarəsinə istinadən məlumat veririk.
Tədbir Gəncə-Daşkəsən Regional Təhsil İdarəsinin təşkilatçılığı ilə baş tutub. Sərbəst güləş üzrə Olimpiya və Avropa çempionu Toğrul Əsgərov və ikiqat Avropa, dördqat Dünya Çempionu, Azərbaycan Milli Yığmasının heyətində çıxış edən qadın güləşçi Mariya Stadnik 7 nömrəli tam orta məktəbdə olublar.
Görüş "Sağlam həyat tərzinin təşviqi" adlanıb. Toğrul Əsgərov idmanın kütləviliyinin artırılması, idmançılarımızın beynəlxalq arenada qazandığı uğurlardan danışıb. Məktəbdə oxuyan şagirdlərin də bu müvəffəqiyyətləri təkrarlaya biləcəyini bildirib.
Mariya Stadnik təmsil etdiyi idman növü və karyerası haqqında danışıb. Gənc qızların idmana marağının artırılması, onların bu mövzuda həvəsləndirilməsinin vacib olduğunu bildirib. O, həmçinin idmanın uşaq, yeniyetmə və gənclərin fiziki və əqli inkişafında müstəsna rol oynadığını qeyd edib.
Daha sonra idmançılar şagirdləri maraqlandıran sualları cavablandırıblar.
[modula id="56056"]
