Gəncə-Daşkəsən Regional Təhsil İdarəsinin tabeliyində fəaliyyət göstərən ümumtəhsil müəssisələrində sağlam psixoemosional mühitin formalaşdırılması məqsədi ilə peşəkar psixoloqlardan ibarət dəstək qrupu tərəfindən məktəb psixoloqları üçün nəzərdə tutulmuş layihəyə start verilib.
Gencexeber.az-a bu barədə təhsil idarəsindən məlumat verilib.
Məlumata əsasən, layihə təhsil, emosional, sosial və ailə aspektlərini əhatə edir. Layihə çərçivəsində həyata keçirilən təlimlər deviant davranışı olan şagirdlərin korreksiyasına, sosiallaşmasına, emosional intellektinin inkişafına və akademik uğurlarına yönəlmiş xüsusi proqram əsasında həyata keçiriləcək.
Layihənin ilk mərhələsində risk qrupuna aid olan uşaqların müəyyən edilməsi məqsədilə müxtəlif sorğular, testlər və anketlərin keçirilməsi üçün məktəb psixoloqları ilə maarifləndirici təlimlər keçiriləcək. Növbəti mərhələlərdə isə məktəblər üzrə statistik hesabatların aparılması və aşkar olunan problemləri aradan qaldırmaq məqsədi ilə risk faktorları olan uşaqlarla, onların valideyn ve müəllimləri ilə inkişaf proqramı həyata keçiriləcək.
Təlimlərdə ümumillikdə 130-a yaxın psixoloqun iştirakı nəzərdə tutulub.
