Gəncədə Dövlət İmtahan Mərkəzi tərəfindən ali təhsil müəssisələrinin magistratura səviyyəsinə qəbul imtahanı keçirilib. Bu haqda 12 fevral tarixində Kəpəz televiziyasına istinadən xəbər veririk.
Ümumilikdə 6 binada keçirilən imtahanda təxminən 1300-dən çox bakalavr iştirak edib. İmtahanı izləmək üçün prosesə 96 nəzarətçi müəllim və 15 imtahan rəhbəri cəlb edilib. Üç saat 30 dəqiqə sürən imtahanda məntiq, informatika və xarici dildən suallar olub. Nəticələr iki mərhələdə elan olunacaq. Yaxın üç gün ərzində qapalı və cavabları kodlaşdırılan açıq tipli tapşırıqların nəticələri haqqında məlumat veriləcək. Yekun imtahan balı isə xarici dil fənləri üzrə esse tapşırıqları yoxlanıldıqdan sonra 6 həftə ərzində təqdim ediləcək.
İmtahan rəhbəri Alik Əliyevin sözlərinə görə, 18 nömrəli məktəbdə 279 nəfər bakalavr imtahan verməli idi. Onlardan 3 nəfəri gəlməyib. Bu imtahanlarda tətbiq olunan yeniliklərdən biri də odur ki, bakalavrlar könüllü olaraq xarici dil fənnindən esse yazırlar. İlk dəfə olaraq, magistratura imtahanında bakalavrlar imtahandan çıxanda sual kitabçalarını apara bilirlər.
