Gəncədə mənzil bazarındakı son vəziyyət açıqlanıb. Bu haqda 16 fevral tarixində Bizim.media-ya istinadən məlumat veririk.
Statistikaya əsasən, son 10 ildə şəhərimizdə əhalinin sayı təxminən 60 000 nəfərə yaxın artıb. Bu da mənzil bazarındakı qiymətlərin dəyişməsinə səbəb olub. Son bir ildə, xüsusilə ötən ilin mart-noyabr aylarında bina evlərinin qiymətində əvvəlki illə müqayisədə 30 faizə qədər artım var.
Rieltorların sözlərinə görə, ilin əvvəlində şəhərin ən yaxşı məhəllələrindən sayılan Mahrasa Bağı qəsəbəsində ümumi sahəsi 137 kvadratmetr olan 4 otaqlı mənzilin qiyməti şəraitindən asılı olaraq, 75-90 min manat arasında dəyişirdisə, hazırda bu rəqəm 95-110 min manat civarındadır. Bu hal bütün ərazilərdə müşahidə olunur. Şəhərin Natəvan və Sevinc qəsəbələrində qiymətlər digər hissələrə baxanda aşağıdır.
“Buradan torpaq almaq istəyənlərin də sayı elə də çox deyil. Tələbat, əsasən, şəhərin mərkəzi və ona yaxın olan ərazilərədir. Məsələn: bu yaxınlarda Gəncə Univermağının arxasında yerləşən küçədə təxminən 3 sota yaxın torpaq sahəsini 45 000 manata satıblar. Mərkəzə yaxın ərazilərdə istər bina evləri, istərsə də həyət evləri və torpaq sahələri çox bahadır”, - deyə rieltor şirkətinin əməkdaşı qeyd edib.
