Gəncədə məişət tullantıları ilə bağlı layihə həyata keçiriləcək. Bu haqda 22 dekabr tarixində İcra Hakimiyyətinə istinadən məlumat veririk.
Avropa Yenidənqurma və İnkişaf Bankından ayrılan kredit vəsaiti ilə icra olunan bərk məişət tullantılarının idarə edilməsi layihəsi üzrə məsləhətçi şirkət “Teknik TEMPO Uluslararası Mühendislik A.Ş.” ilə İcra Hakimiyyəti arasında layihənin icra edilməsində texniki dəstək və məsləhət xidmətləri göstərmələrinə dair müqavilənin imzalanma mərasimi baş tutub.
Burada icra başçısı Niyazi Bayramov, “Teknik TEMPO Uluslararası Mühendislik A.Ş.”nin icraçı direktoru Evren Akyol, “Urban Technology Alliance”in rəhbəri Andryu Levkonyuk, YAP Gəncə Şəhər Təşkilatının sədri Bayram Aslanov, AMEA Gəncə Bölməsinin sədri akademik Fuad Əliyev, Gəncə Dövlət Universitetinin rektoru Yusif Yusibov, ADAU-nun rektoru Zəfər Qurbanov, ATU-nun rektor əvəzi Yaşar Ömərov, bələdiyyə sədrləri, Ağsaqqallar Şurasının sədri və şəhərdə fəaliyyət göstərən idarə, müəssisə, təşkilat rəhbərləri iştirak ediblər.
Anlaşmaya əsasən, bərk məişət tullantılarının idarə edilməsi infrastrukturunun təkmilləşdirilməsi məqsədilə tullantıların toplanması və digər şəhər xidmətləri üçün nəqliyyat vasitələrinin, avadanlıqların, tullantı konteynerlərinin alınması, tullantıların atılma məntəqəsi və dayanacağın təkmilləşdirilməsi ilə bağlı tikinti işlərinin görülməsi nəzərdə tutulub.
