Paytaxtın müxtəlif ərazilərində limon satmaqla məşğul olan Yevlax sakini, 61 yaşlı Zahid Hüseynov öz adının kiberdələduzluq sxemində istifadə edildiyini iddia edir. O, adına 1 milyon manata yaxın vəsaitin mənimsənildiyi bir hesabın açıldığını bildirir.
"Xəzər Xəbər" bildirir ki, Zahid Hüseynovun sözlərinə görə, bir neçə ay əvvəl Daşkəsən Rayon Polis Şöbəsindən zəng gəlib və o, yaşlı bir qadının bank kartından kiberdələduzluq yolu ilə pul mənimsəməkdə şübhəli bilinərək Daşkəsənə aparılıb.
Hadisədən sonra ciddi narahatlıq keçirən Zahid Hüseynov adına hər hansı bir hesabın açılıb-açılmadığını yoxlamaq üçün banklara müraciət edib. Lakin heç bir bank bu məlumatı təsdiq etməyib. Ehtimal olunur ki, sözügedən vəsait elektron pul kisəsi vasitəsilə yaradılmış hesabda olub.
Zahid Hüseynovun əsas istəyi, onun şəxsiyyətindən istifadə edərək bu kiberdələduzluğu həyata keçirən cinayətkar dəstənin aşkar edilərək istintaqa cəlb edilməsidir. O, bu işin təkcə onun taleyi deyil, həm də mənimsənilən pulların əsl sahiblərinin hüquqları baxımından vacib olduğunu vurğulayıb.
Daxili İşlər Nazirliyinin (DİN) Mətbuat Xidmətinin əməkdaşı Cəsarət Qənbərli məsələyə münasibət bildirib. O qeyd edib ki, həmin vətəndaşın müraciəti əsasında ərazi polis orqanında araşdırma aparılır.
