Gəncədə qışa hazırlıq işləri görülüb. Bu haqda 23 dekabr tarixində Kəpəz televiziyasına istinadən məlumat veririk.
Bildirilir ki, mövcud kommunal texnikanın qışa hazırlığı yekunlaşıb. Maşınlar və aqreqatlar texniki baxışdan keçirilərək yolların qardan təmizlənməsi üçün hazır vəziyyətə gətirilib. 4 avtoqreyder, 2 avtosüpürgə, 50-yə yaxın özü yüküboşaldan avtomobil və digər texnikalar yollarda hərəkətin təhlükəsizliyi üçün fəaliyyət göstərəcək. Həmçinin 50 min kubmetr qum, 20 ton duz, dizel və benzin ehtiyatı yaradılıb.
Soyuq havalarda şəhər sakinlərinin qaza olan tələbatı da ödəniləcək. “Azəriqaz” İB ilə əlaqələr şöbəsinin rəisi Eldəniz Vəliyevin sözlərinə görə, boru xətlərində yenilənmə işləri həyata keçirildiyindən qaz istehlakı üçün istifadə olunan istismarda olan boru xətləri, avadanlıqlar ötən illə müqayisədə daha yaxşı və etibarlıdır.
Bundan başqa, qış mövsümündə nisbətən çox rast gəlinən hallar sırasında keyfiyyətsiz qızdırıcı cihazlardan istifadə yer tutur. Qeyd olunur ki, Fövqəladə Hallar Nazirliyinin əməkdaşları tərəfindən maarifləndirici tədbirlərin həyata keçirilməsi və dəm qazı ilə bağlı tövsiyələri vətəndaşlar tərəfindən mütləq nəzərə alınmalıdır.
FHN-in əməkdaşı Ehtiram Xəlilov: “Qaz cihazları saz və qaydalara uyğun, qurğu olan məkanın hündürlüyü isə 2 metr 20 sm-dən çox olmalıdır. Havaçəkən sistem işləməli, nəfəslik açıq, hamam otağında ventilyasiya borusu, qapının aşağısında dəliklər olmalı, tüstü bacaları ildə iki dəfə təmizlənməlidir. Dəm qazı iysizdir, hiss edilmir”.
“Azərişıq” əməkdaşları da, həmçinin qış mövsümünə hazırlıq işləri çərçivəsində transformatorlara baxış keçiriblər. Köhnə elektrik xətləri yenilənib, işıq dirəkləri dəyişdirilib. Görülən işlər qışda şəhər sakinlərinin elektrik enerjisi ilə bağlı çətinliklər yaşamaması məqsədini daşıyır.
