“Kəpəz” futbol klubu yeni baş məşqçisinin adını tezliklə açıqlayacaq. Azər Bağırovun vidasından sonra boş qalan postu yerli mütəxəssis tutacaq.
Futbolinfo.аz xəbər verir ki, gəncəlilər bir neçə mütəxəssislə danışıq aparsa da, namizədlərin sayı ikiyə enib. Hazırda son müzakirələr aparılır və Adil Şükürovla ortaq məxrəcə gəlindiyini demək olar. Təcrübəli mütəxəssis bütün şərtləri razılaşdırıb.
Maliyyə şərtlərində ciddi artım yoxdur – əvvəlki məşqçiylə müqayisədə qismən çox maaş alacaq Şükürov tezliklə heyətin formalaşdırılmasına başlamaq istəyir. “Kəpəz” onun təyinatını açıqlayan kimi oyunçu seçimlərinə start veriləcək.
Xatırladaq ki, Adil bəy 2023/24 mövsümünün əvvəlində çətin vəziyyətdə olan komandanı qəbul edərək Premyer Liqada saxlamağı bacarmışdı. Ötən mövsüm isə “Kəpəz”in bərbad startı Şükürovun istefasıyla nəticələndi.
