Futbol komandamız rəqibi ilə sonuncu oyununda hakim idarəçiliyi ilə razılaşmayıb. Bu haqda 13 fevral tarixində futbol klubuna istinadən xəbər veririk.
"Kəpəz" komandası Azərbaycan Premyer Liqasının XXII turunda "Səbail"ə uduzduqları oyunda hakim idarəçiliyindən narazı qalıb. Təmsilçimizin sözlərinə görə, oyunun 44-cü dəqiqəsində qapımıza təyin olunan penalti epizodundan əvvəl künc zərbəsi zamanı rəqib komandanın futbolçusu Amil Yunanovu arxadan itələsə də, baş hakim Nicat İsmayıllı qayda pozuntusu qeydə almadı. Eyni epizodun davamında Junior Martinsin zərbəsindən sonra top “Səbail”in oyunçusuna toxunaraq meydanı tərk edib. Laysman topun rəqibdən çıxdığına işarə edərək bayrağını müvafiq istiqamətə yönləndirsə də, baş hakim yenə fərqli qərar qəbul edib.
Həmçinin son nəticədə epizodun davamı qapımıza penalti ilə nəticələnib. 48-ci dəqiqədə komandamızın yerinə yetirdiyi künc zərbəsi zamanı rəqib futbolçu Rüfət Abdullazadə cərimə meydançasında hər iki əli ilə topla oynasa da, referi Var-a ehtiyac duymadı", - klubun bəyanatında vurğulanıb.
Xatırladaq ki, görüş bölgə klubunun 1:4 hesablı məğlubiyyəti ilə bitib.
