Gəncə təmsilçisi cərimələnib. Bu haqda 13 mart tarixində PFL-ə istinadən məlumat veririk.
AFFA-nın İntizam Komitəsinin iclası keçirilib. Burada bir sıra qərarlar qəbul olunub. Əvəzedicilər liqasında XXVI turun “Kəpəz-2” - “Neftçi-2” oyununda “sarı-göylər”in məşqçisi 76-cı dəqiqədə hakimi təhqir edib. Bu səbəbdən Orxan Verdiyev birbaşa qırmızı vərəqə alıb. Daha sonra mütəxəssis referiyə təzyiq göstərməyə cəhd edib. Bu onun 5 oyunluq diskvalifikasiyasına, “Kəpəz”in isə 400 manat cərimələnməsinə səbəb olub.
Bundan başqa, sözügedən matç zamanı 5 futbolçusu sarı vərəqə aldığına görə “Kəpəz-2” komandası 70 manat cərimə edilib. Azarkeşlər hakimin ünvanına kütləvi şəkildə təhqiramiz ifadələr səsləndirdiyinə və bu, cari mövsümdə ilk dəfə yaşandığına görə gəncəlilərə xəbərdarlıq olunub.
Həmçinin oyun zamanı topdaşıyanların və xərəkdaşıyanların say limiti pozulduğuna görə “sarı-göylər” 160 manat cərimələnib.
Misli Premyer Liqasında isə XXVI turun “Kəpəz” – “Neftçi” oyununa baxış keçirilib. Təmsilçimizin azarkeşləri tərəfindən matçın rəsmi şəxslərinin ünvanına kütləvi şəkildə təhqiramiz ifadələr səsləndirildiyinə görə “Kəpəz” 1000 manat cərimə edilib.
