Gəncə təmsilçisinin oyunçusu sonuncu görüşdə fərqlənib. Bu haqda 6 fevral tarixində Peşəkar Futbol Liqasına istinadən xəbər veririk.
Söhbət “Kəpəz”in futbolçusu Amil Yunanovdan gedir. Oyunçu Azərbaycan çempionatlarında 50-ci qolunu vurub. Onun yubiley qolu Azərbaycan Premyer Liqasının XXI turuna təsadüf edib.
“Kəpəz”in 31 yaşlı hücumçusu “Araz-Naxçıvan”la ev görüşündə fərqli oyun nümayiş edib. O, komandasının 3:1 hesabı ilə qalib gəldiyi matçda son qolun müəllifi olub. Yunanov Premyer Liqadakı 191-ci oyununda 50-ci qola imza atıb.
Hücumçunun orta məhsuldarlığı 0,26-ya bərabərdir. Bu, futbolçunun klubumuzda ilk qoludur. O, bunadək “Sumqayıt”da 28, “Şamaxı”da 14, “Səbail”də 6, “Qəbələ”də 1 dəfə fərqlənib.
