Gəncədə oynayan futbolçuda xəstəlik aşkarlanıb. Bu haqda 26 oktyabr tarixində Xəzər Xəbər-ə istinadən məlumat veririk.
“Kəpəz”in futbolçusu Abdullahi Şuaybunun qanında hepatit B virusu tapılıb. Bu haqda afrikalı idmançının sabiq meneceri Dmitri Selyuk məlumat yayıb. Onun sözlərinə görə, futbolçu sağlamlıq testindən keçərkən analizləri dəyişdirilib və “sağlam” olaraq qeyd olunub.
Məsələ ilə bağlı Baş Prokurorluq AFFA-ya müraciət edib. Bildirilib ki, futbol klubu məsələni ətraflı araşdıraraq quruma məlumat verməlidir.
“Kəpəz”in Mətbuat Xidmətinin rəhbəri Azad Mustafayev məlumatı təsdiqləyib. O bildirib ki, Afrikadan gələn əksər futbolçularda bu virus olur.
“Abdullahi Şuaybuya gəlincə, bəli, onda hepatit B virusu aşkarlanıb. Amma bu, onda irsidir, sonradan yaranmayıb. Heç bir təhlükəsi yoxdur, yoluxucu deyil. Nigeriyalı futbolçu dəfələrlə klub tərəfindən detallı analizlərə cəlb edilib. Səhhətində, sağlamlığında heç bir çətinlik yoxdur. O, komandamızın əvəzedilməz oyunçularından biridir, fiziki göstəricilərində problem olmur.
Futbolçu ilə də söhbət etmişik. O dedi ki, əvvəlki meneceri ilə münasibətləri başa çatıb. Həmin şəxs də bu yolla ona problem yaratmağa çalışır. Yolları ayrılıb deyə gərginlik yaradır. Sağlamlıq baxımından problemi də yoxdur, valideynlərindən keçib bu virus. Həkimlərin də analizlərdən sonra rəyləri var və onlar da bildirirlər ki, yoluxdurucu ola bilməz”, - deyə Mustafayev qeyd edib.
