Gəncədə məskunlaşan Kəlbəcər rayonunun sakinləri doğma yurdlarına qayıdacaqlar. Bu haqda 27 yanvar tarixində Kəpəz televiziyasına istinadən xəbər veririk.
Gəncənin Gülüstan yaşayış massivində yaşayan Kəlbəcər rayonunun Zallar, Zar və Yanşaq kəndlərinin sakinlərinin 30 illik həsrətinə son qoyulacaq. Burada yenidənqurma işləri və sosial infrastruktur layihələri icra olunur. İlkin olaraq, 150 ailə doğma yurdlarına dönəcək. 2026-cı ilin sonuna kimi 12 min kəlbəcərlinin öz ata-baba yurduna qayıtması gözlənilir.
“Doğma yurdumuza qayıdacağımıza çox sevinirik. 30 illik həsrətimizə son qoyulur” deyə Kəlbəcər rayonunun sakinləri bildiriblər. Millət vəkili Aqil Məmmədovun sözlərinə görə, burada 2-3 və 4 mərtəbəli binaların tikintisi başlayıb. Başlanmış tikililər bu ilin birinci yarısından da tez başa çatacaq. Digər kəndlərdə də artıq işlərin başlanması gözlənilir.
