Bakıda iki gün əvvəl itkin düşən gəncəli tələbə tapılıb.
Lent.az xəbər verir ki, yoxa çıxan Vasif Elnur oğlu Abidinov Bakı Beynəlxalq Avtovağzal Kompleksi ərazisində aşkar edilib.
Məsələ ilə bağlı Daxili İşlər Nazirliyinin mətbuat xidmətindən bildirilib ki, ailə üzvlərini məlumatlandırmadan yaşadığı ünvanı tərk edərək naməlum istiqamətə gedən 19 yaşlı Vasif Abidinovun yeri polis əməkdaşları tərəfindən müəyyən edilib və o, polis şöbəsinə gətirilib.
Aparılan araşdırmalar zamanı onun itkin düşməsində hər hansı kriminal tərkib aşkar edilməyib. Məlum olub ki, hadisə şəxsi niyyətindən irəli gələn addım olub. Hazırda Vasiflə profilaktik söhbət aparılır, bu cür davranışın ailə üzvləri və yaxınları arasında narahatlıq yaratdığı onun diqqətinə çatdırılıb.
Yaxınlarının sözlərinə görə, hazırda onun Gəncəyə gətirilməsi üçün polisə müraciət edilib.
Qeyd edək ki, Vasif Abidinov Azərbaycan Dövlət Aqrar Universitetinin 2-ci kurs tələbəsidir. O, tətil günlərini Bakıda əmisinin evində keçirmək üçün paytaxta gəlibmiş. Yaxınlarının verdiyi məlumata əsasən, gənc iki gün əvvəl paytaxtın Günəşli parkında görülmüş, bundan sonra onunla əlaqə kəsilmişdi.
