Gəncədə sənaye sahəsində yenilik olacaq. Bu haqda 17 fevral tarixində Fed.az-a istinadən məlumat veririk.
Bununla bağlı İqtisadi Zonaların İnkişafı Agentliyinin idarə heyətinin sədri Seymur Adıgözəlov mətbuat konfransında çıxış edib. Rəsminin sözlərinə görə, Nizami yurdunda sənaye parkının yaradılması planlaşdırılır.
"Hazırda İqtisadiyyat Nazirliyi tərəfindən sənaye parkının yerləşəcəyi ərazinin, prioritet istiqamətlərin və s. məsələlərin dəqiqləşdirilməsi istiqamətində işlər görülür. Parkın əsas fəaliyyət istiqaməti kimi metallurgiya klasterinin yaradılması, avtomobil sənayesinin daha da inkişaf etdirilməsi ilə lokalizasiyanın artırılması, tikinti materialları sənayesinin (kərpic, keramika, çınqıl və qum, üzlük daşı və s.), yüngül sənayenin (o cümlədən xalça, gön-dəri, toxuculuq və s.), qida sənayesinin (meyvə-tərəvəz məhsullarının konservləşdirilməsi, quşçuluq, süd və ət məhsulları, qurudulmuş və dondurulmuş meyvə, günəbaxan yağı istehsalı və s.), yeni logistika və ticarət mərkəzlərinin yaradılması və s. sahələrin müəyyənləşdirilməsi nəzərdə tutulur”, – deyə Adıgözəlov qeyd edib.
