Gəncədə icra başçısının müavinlərinin saxlanılması xəbərinə açıqlama verilib. Bu haqda 4 mart tarixində Qafqazinfo-ya istinadən məlumat veririk.
Bir sıra media səhifələrində Gəncə Şəhər İcra Hakimiyyətində hüquq-mühafizə orqanları tərəfindən əməliyyat keçirilməsi barədə xəbərlər yayılıb. Orada icra başçısının birinci müavini Səməd Tomuyev və digər müavinlər, həmçinin Aparatın Memarlıq və tikinti şöbəsinin müdiri Baş memar Elxan Məmmədovun saxlanıldığı deyilib.
Məsələ ilə bağlı İcra Hakimiyyətindən açıqlama verilib. Saxlanıldığı deyilən Səməd Tomuyev xəbərləri təkzib edib.
“Mən işimin başındayam. Təəssüf ki, bəzi informasiya saytlarında həqiqəti əks etdirməyən məlumatlar yer alıb. Bu məlumatlar yalandır”, - deyə o bildirib.
Şəhər rəhbəri Niyazi Bayramov da məsələ ilə bağlı danışıb. O da məlumatın yanlış olduğunu vurğulayıb.
Bundan başqa, Baş Prokurorluq məsələyə münasibət bildirib. Onlar media subyektlərindən qanunvericiliyin tələblərinə riayət etməyi, rəsmi qurumlarla dəqiqləşdirilmiş məlumatların ictimailəşdirilməsini xahiş ediblər.
Qurumdan bildirilib ki, Gəncə Şəhər İcra Hakimiyyətində əməliyyat keçirilib. Prosedur bir sıra qanun pozuntuları ilə bağlıdır. Hələlik saxlanılan yoxdur.
