Təyyarə qəzasında həlak olan stüardessa Hökumə Əliyevanın atası Cəlil Əliyev onunla fəxr etdiyini deyib.
Report.аz xəbər verir ki, o, bunu Heydər Əliyev Beynəlxalq Aeroportunda Bakı-Qroznı reysini yerinə yetirən “Embraer-190” tipli sərnişin təyyarəsinin qəzaya uğraması nəticəsində həlak olan ekipaj üzvləri ilə vida mərasində bildirib.
C.Əliyev bildirib ki, Hökumə Əliyevanın vəfatı təkcə ailəsi üçün deyil, dövlət və xalq üçün də ağır itkidir:
"Mən qızımla fəxr edirəm. O, daim yaşayacaq. Onu çox sevirəm".
Xatırladaq ki, AZAL-a məxsus Bakı-Qroznı aviareysini həyata keçirən sərnişin təyyarəsi dekabrın 25-də Qazaxıstanın Aktau şəhəri yaxınlığında qəzaya uğrayıb. Təyyarənin göyərtəsindəki 67 nəfərdən 38-i həlak olub, 29-u sağ qalıb.
Hər iki pilot da daxil olmaqla 3 ekipaj üzvü həlak olub, iki ekipaj üzvü isə sağ qalıb. Dekabrın 26-da Azərbaycana 14 yaralı və 4 nəfərin meyiti gətirilib. Dekabrın 29-da isə 3-ü ekipaj üzvü olmaqla 24 nəfərin nəşi ölkəyə gətirilib.
