Bu gün Azərbaycan mədəniyyətində parlaq iz qoymuş böyük şair, tanınmış maarifçi və ictimai xadim Əhməd Cavadın anım günüdür.
Gencexeber.az məlumat verir ki, Əhməd Cavad 1892-ci il mayın 5-də Gəncə qəzasının Şəmkir dairəsinin Seyfəli kəndində ruhani ailəsində dünyaya gəlib. Atası Məmmədəli axund olub və onun cəmi beş yaşı olanda dünyasını dəyişib. O, ilk təhsilini molla məktəbində alıb, üç il orada oxuyub. Sonrakı təhsilini Gəncədə Müsəlman Ruhani Seminariyasında alıb (1906-1912-ci illər) və oranı müvəffəqiyyətlə bitirib. 1913-cü ildə Zaqafqaziya şeyxülislamı Pişnamazzadənin imzası ilə ona müəllimlik şəhadətnaməsi verilib.
Əhməd Cavad Azərbaycan Xalq Cümhuriyyətinin yaradılmasında fəal iştirak edib. O, Azərbaycan dili üzrə ilk dərsliyin müəllifi olub. 8-10 dildə sərbəst oxumaq, danışmaq və yazmağı bacaran mütəfəkkir rus dili üzrə professor elmi adını alan ilk azərbaycanlı olub. Cavad öz təxəllüsünü türkiyəli şair Əhməd Cavadın adından götürüb. Beləliklə, eyni tarixi dövrdə türk dünyasında iki Əhməd Cavad yazıb-yaradıb.
Cavad "Yaşıl qələmlər" cəmiyyətinin yaradıcısı və katibi, Azərbaycan Proletar Yazıçıları Cəmiyyətinin üzvü olub. O, Xalq Cümhuriyyətinin milli marşlarının əksəriyyətini, o cümlədən Dövlət Himnimizin mətnini qələmə alıb.
O, 1920-1937-ci illərdə dəfələrlə həbs olunub, təqiblərə məruz qalıb. 1937-ci il martın 21-də şairi Azərbaycan Yazıçılar İttifaqının üzvlüyündən çıxarılıb. Həmin il iyunun 4-də onu H.Cavid, M.Müşfiq və V.Xuluflu ilə eyni vaxtda həbs ediliblər. Oktyabrın 12-dən 13-nə keçən gecə 15 dəqiqəlik məhkəmənin qərarı ilə Əhməd Cavad güllələnib.
Qeyd edək ki, 2022-ci ildə Prezidentin Sərəncamı ilə Əhməd Cavadın anadan olmasının 130 illiyi ölkəmizdə və xaricdə silsilə tədbirlərlə qeyd edilib.
