Hacıkəndin Almalıq ərazisi çirkləndirilib.
Gencexeber.az-a daxil olan şikayətə əsasən, Hacıkəndin Almalıq adlanan tanınmış istirahət zonasında təbiətin mənzərəsi deyil, ətrafa səpilən tullantılar diqqət çəkib. Həmişə təmizliyi və sakitliyi ilə seçilən bu ərazi bu dəfə plastik butulkalar, qida qabları, salfetlər və digər məişət tullantıları ilə dolu olub.
Şikayətçi bildirir ki, əraziyə istirahət məqsədilə getsələr də, sanki zibilliyə düşüblər:
“Əlimizdən gəldiyi qədər təmizləməyə çalışdıq, lakin zibillər o qədər çox idi ki, tam şəkildə mümkün olmadı. Bu əraziyə dəfələrlə getmişəm, amma ilk dəfədir ki, bu qədər acınacaqlı vəziyyətlə qarşılaşıram.”
Vəziyyətin səbəbi kimi isə həmin yerin ödənişsiz olması göstərilir. Bildirilir ki, bu səbəbdən bəzi insanlar məsuliyyətsiz davranaraq təbiətə ziyan vurur:
“Görünür, ödənişsiz olduğu üçün heç bir məsuliyyət hiss etmədən hərəkət edirlər. Halbuki ödənişli yerlərdə ən azından təmizlik və nəzarət təmin olunur.”
Qeyd olunur ki, hətta ən yüksək təpələr belə tullantılardan sığortalanmayıb. Bu isə sadəcə məsuliyyətsizlik deyil, təbiətə qarşı açıq-aşkar hörmətsizlikdir.
Sakinlər inanırlar ki, məsələ ictimailəşdikcə fərdi məsuliyyət artacaq və ərazi üzrə aidiyyəti qurumlar nəzarət və təmizlik məsələlərinə daha ciddi yanaşacaqlar.
