Dünya Güləş Birliyinin İntizam Komitəsi İtaliya güləşçisinin Avropa Olimpiya Təsnifat Turnirinin yarımfinalında gəncəli idmançıya məğlub olması ilə bağlı etirazı barədə qərar qəbul edib. Bu haqda 24 aprel tarixində Report-a istinadən xəbər veririk.
Qərara əsasən, Turan Bayramov görüşün qalibi olaraq qalıb. Çünki Dünya Güləş Birliyinin 53-cü maddəsinə əsasən, qalib döşəkdə elan edildikdən sonra görüşün nəticəsi dəyişdirilə bilməz. Həmçinin bu görüşün hakimi və nümayəndələrinin 2-8 ay müddətinə diskvalifikasiya edilməsi qərara alınıb.
Xatırladaq ki, Turan həmin qarşılaşmada (8:8) qalib gələrək Paris olimpiadasına lisenziya qazanıb. Bundan sonra İtaliya Güləş Federasiyası hakim səhvləri ilə bağlı şikayət edib. Dünya Güləş Birliyi komissiyaları şikayəti araşdırıb, hakimlər və nümayəndələrlə söhbətlər aparıb, sonra qərar qəbul edib.
